Oñtüstik Qazaqstanda jaña sw élektr stancïyası iske qosıldı

Oñtüstik Qazaqstanda jaña sw élektr stancïyası iske qosıldı

14 şilde, 19:16 450 Oñtüstik Qazaqstan oblısı
Oñtüstik Qazaqstanda jaña sw élektr stancïyası iske qosıldı

Bügin Oñtüstik Qazaqstan oblısındağı Say`ram awdanında «Mankent» şağın sw élektr stancïyası iske qosıldı, dep xabarlay`dı Vnews.kz.

Xalıqtı turaqtı äri sapalı élektr énergïyasımen qamtïtın sw élektr stancïyasınıñ aşılw saltanatına oblıs äkimi J.Tüy`mebaev pen «Aqsw-Énergo» JŞS dïrektorı A.Orman qatıstı.

«Aqsw Énergo» JŞS-niñ bul jobası «Bïznestiñ jol kartası 2020» bağdarlaması ayasında qoldaw tapqan. Bul stancïya jılına 2,5 MVt  élektr qwatın öndirwge qawqarlı. Joba qunı 283 mln.teñge bolatın käsiporında 6 adam jumıspen qamtılğan.

Oblısta kün, jel, sw énergïyasınıñ äleweti joğarı ekenin ay`tqan äkim, dästürli énergïya közderimen qatar, jaña énergetïkanı da damıtw qajettigin atap ötti.

«Özderiñizge belgili, bïıl Astana qalasında «Bolaşaq énergïyası» taqırıbında ÉKSPO-2017 xalıqaralıq mamandandırılğan körmesi ötip jatır. Älemdik deñgey`de ötkizilip jatqan ÉKSPO-2017 xalıqaralıq körmesi texnïkalıq jetistiktermen, jañartılatın énergïya közderiniñ moldığımen, ğılımğa umtılwdıñ mañızdılığımen bükil älemniñ nazarın awdarwda. Memleket basşısı N.Ä.Nazarbaev 2050 jılğa dey`in munday` énergïya ülesin 50 pay`ızğa dey`in köbey`twdi qamtamasız etwdi tapsırdı. Bügingi iske qosılğan élektr stancïyası taza élektr énergïya öndirwmen qatar, énergo reswrstardı ünemdewge bağıttalğan»,-dedi äkim öz sözinde.

Jalpı «jasıl ékonomïkağa» köşw jönindegi  tujırımdamağa säy`kes, Say`ram awdanında  2 joba iske qosılıp otır.

«Aqsw Énergo» JŞS-i 2014 jılı «Kün nurınan élektr qwatın öndiretin qwattılığı 1MVt bolatın «Aqbay`» élektr stancïyasın iske qosqan bolatın. Qunı 300 mln.teñge bolatın élektr stancïyası 2016 jılı 987,166 MVt énergïya közin öndirgen.

Eki joba tolıq qwattılıqta jumıs istegende awdannıñ énergïya közine degen suranısınıñ altıdan birin qamtïtın boladı.

Loading...