Тәшкенді тәнті еткен қазақ қызы
Наверх

Астана
USD 335.71
EUR 357.36
CNY 48.76
RUB 5.23


Тәшкенді тәнті еткен қазақ қызы

25 қараша 2016 ж 18:55

Алматыдағы П.Чайковский атындағы музыкалық колледж студенті Өзбекстан астанасынан үлкен жеңіспен оралды. 405 адам қатысқан өнер додасында Қорқыттың қобызын сарнатқан қазақ қызының еңбегі, ұстазының үміті ақталды, деп хабарлайды BNews.kz.


Жуырда ғана Тәшкенде «Она юрт оханглари» («Туған елдің әуені») деп аталатын ІІ халықаралық музыкалық байқау мәресіне жетті. Өнер додасы жыл сайын Өзбекстан Республикасы Білім, мәдение және спорт жөніндегі министрлігі, «Соглом авлод учун» халықаралық қайырымдылық қоры және Өзбекстанның композиторлар Одағы ұйымдастырған.

Биылғы өнер сайысына 9 елден барлығы 405 өнерпаз қатысқан. Олар 12-15 және 16-19 жас аралығындағылар болып екі топқа бөлінген. Әр топ бойынша үрмелі, ысқыштар, ұрмалы және ішекті аспаптар номинациясы бойынша бөлінген.

Алматыдан осы байқауға арнайы барған П.Чайковский атындағы музыка колледжінің 4 курс студенті Индира Жандашова ысқыштар номинациясы бойынша бірінші орынды жеңіп алды.

«Бұл жалпы үлкен конкурс. Біздің номинация бойынша Қазақстан, Өзбекстан, Қырғызстан, Тәжікстан және Азербайжаннан өнерпаздар қатысты. Қай қайсысы болмасын өте өнерлі, талантты музыканттарын алып келген. Біз де осы байқауға тиянақты дайындалған едік. Шәкіртім Индира ысқыш аспаптардың ішінде қобызбен шығып, өте тамаша өнер көрсетіп, бірінші орынды жеңіп алды. Еңбегіміз жанды. Менің үкілеген үмітім ақталды. Қуанышымызда шек жоқ», дейді жеңімпаздың ұстазы Гүлайым Қожамқұлова.

«Туған елдің әуені» халықаралық байқауы 2014 жылдан бері дәстүрлі түрде өтіп келеді. Аталған байқау жәй өнерпаздардың конкурсы емес, кәдімгі кәсіби музыкалық білім беретін арнайы және жоғары оқу орындарының түлектері мен ұстаздары қатысатын беделді дода екенін айта кету керек. Байқауға төрелік еткен ресейлік мамандардың айтуынша, бұл жас музыканттарға өзінің өнерін көрсетіп, болашаққа бағдар жасауына және бүгінгі музыкалық өнерде бар дүниелерді елеп-екшеп, сараптамадан өткізуге де үлкен мүмкіндік береді.


comments powered by HyperComments