Отырарда көпқабатты 10 тұрғын үй пайдалануға берілді
Наверх

Астана
USD 334.48
EUR 355.62
CNY 48.58
RUB 5.25


Отырарда көпқабатты 10 тұрғын үй пайдалануға берілді

25 қараша 2016 ж 11:31 , Оңтүстік Қазақстан облысы
ФОТО: ontustik.gov.kz

Оңтүстік Қазақстан облысының әкімі Жансейіт Түймебаевтың аудан, қалаларды аралау сапарының кезектісі Отырар ауданы болды. Жұмысшы топ онда да бірқатар әлеуметтік, кәсіпкерлік және туристік нысандарды аралап, жұмысымен танысты, деп хабарлайды облыс әкімінің баспасөз қызметі.


Мұндағы бірінші нысан Темір ауыл округіндегі «Агро-Азия» ЖШС-нің жүгері өңдеу, құрама жем шығару кәсіпорнының іске қосу салтанатты рәсіміне қатысудан басталды.

«Тәуелсіздіктің 25 жылдығына орай, бұл кешеннің ашылуы ауданда жүгері кластерін дамытуға негіз болмақ. Себебі, бұрындары дихандар жиған өнімдерін ұтымды бағаға сата алмай, жауын астында қалып, кептіре алмай, ала жаздай еткен еңбегі зая кететін. Енді шаруаларға өнімдерін ысырапсыз жинап алуына және тиімді бағаға өткізуіне мүмкіндік туып отыр. Көптеген шаруалардың келесі жылы егіс көлемін ұлғайтуына мүмкіндік бар», – дейді Ж.Қансейітұлы құттықтау сөзінде.

Пайдалануға берілген кешеннің жалпы жоба құны – 619 млн теңге. 5 га жерді алып жатқан кәсіпорында 16 адам тұрақты жұмыспен қамтылған. Сыйымдылығы 10 мың тонналық кешенде болашақта 17 түрлі өнім шығарып, Иран, Қытай елдеріне экспортталады.

Мұнан соң олар Арыстан баб кесенесінде болып, туристік маңызды нысандар – Отырар төбе мен Арыстан бабтың маңын абаттандыру жобаларымен танысты. Атап айтқанда, аудан басшысы Е.Айтаханов келесі жылдың бюджетіне кесененің кіре беріс қақпасы мен Түркістан-Шәуілдір бағытындағы жолдың аралығын жөнге келітіріп, зиярат жасаушылар мен туристерге ыңғайлы орта құру жұмыстарының кіргізілетінін жеткізді. Сондай-ақ, Отырар төбе маңы мен қалашықты Арыстан бабпен қосатын ұзындығы 1,7 шақырым жолды абаттандыру жұмыстарына көңіл бөлінбек. Аталған жобаларға қанық болған облыс әкімі игі істің жобасын тағы бір пысықтап, облыстағы білікті мамандардан кеңес алуды тапсырды.

Егемендіктің ширек ғасырлық тойында Қоғам ауыл округі Мыңшұқыр елді мекенінде пайдалануға берілген 180 пәтерлі көпқабатты 10 тұрғын үй отырарлық ағайынды ерекше қуантты. Жергілікті халықтың қуанышымен бөліскен өңір басшысы Ж.Түймебаев қоныс тойын тойлаушылардың қатары алдағы уақытта мұнан да көп болатынына сенім білдірді.

«Қолжетімді баспана-2020» бағдарламасы аясында салынған үйлердің іргетасын қалау 2015 жылдың қазан айында басталған болатын. Жалпы ауданы 18 792 шаршы метр көпқабатты баспаналарда бір бөлмелі 90, екі бөлмелі 90 және үш бөлмелі 90 пәтер бар.

Алдағы уақытта Отырарда 450 пәтерлі 25 тұрғын үйдің құрылысын жүргізу жоспарланып отыр. Жалпы, ауданда бүгінгі таңда тұрғын үй кезегіне 716 азамат тіркелген.

Ауданға сапары кезінде жұмысшы топ аялдаған соңғы нысан – «Отырар Сүт-Ет» СТК-нің жұмысы болды. Көкмардан ауылында орналасқан өндірістік кооператив сапалы ет пен сүттен бөлек, еліміздің ірі қалаларын «Маяқұм» шұбатымен қамтамасыз етіп отыр. Бүгінде кооперативте 700-ге жуық түйе, 88 бас сиыр бар. Тәулігіне 1,25 тонна шұбат, 900 литр сүт өндіреді. Кооперативке 67 шаруа қожалығы мүше. Болашақта ет пен сүтті терең өңдеуді жоспарлап отыр. Өндірілген өнімдер 6 облыс пен Алматы, Астана қалаларына жеткізіліп, тұрғындарға ұсынылады.

Жұмыс сапарының соңы, әдеттегідей, Отырар ауданының активімен кездесумен жалғасты. Алдымен, аудан әкімі Ерлан Айтаханов Отырардың әлеуметтік-экономикалық даму көрсеткіштері мен кемшін тұстарын баяндады. Мұнан соң, Ж.Түймебаев аудандағы сын-ескертпелер мен тапсырмалардың ретін атады.

Мәселен, Отырар алқабындағы 42 мың гектар егістік жердің 24 мың гектары ғана (58 пайыз) игерілген. Дәндік жүгері межеден 2 мың гектарға кем егілген. Өнеркәсіп және кәсіпкерлік саласы бойынша кейбір индикаторлар орындалмай келеді. Мәселен, индустрияландыру картасына енгізу жоспарланған 2 жобаның 1-еуі ғана орындалған. Мұнан бөлек, индустриялық аймаққа арналған жердің көлемі 97 гектар болса, аудан экономикасының өсу резервтері толық пайдаланылмай отыр.

Осындай кемшіліктерді тізген аймақ басшысы ауданда кәсіпкерлікті қолға алу қажеттігін айтып, тоқтап тұрған кәсіпорындарды іске қосу жұмысына инвесторлар тарту керектігін жеткізді. Туризм саласы бойынша Отырардың потенциалының мықты екенін алға тартқан әкім өңірге отандық және шетелдік қонақтарды көптеп тарту жұмыстарын қолға алуды тапсырды. Сондай-ақ, бұл ортақ істі атқаруда ауыл әкімдері аудан әкіміне көмекші болып, межелі жоспарларды бірлесіп орындауға шақырды.


comments powered by HyperComments