Мұхтар Алтынбаев: Су-27 әскери ұшағының құлауына жанармай себеп болуы мүмкiн

Мұхтар Алтынбаев: Су-27 әскери ұшағының құлауына жанармай себеп болуы мүмкiн

22 желтоқсан, 12:55 371 Астана
Мұхтар Алтынбаев: Су-27 әскери ұшағының құлауына жанармай себеп болуы мүмкiн

Кеше түнгі оқу-жаттығу кезінде Су-27 әскери ұшағы апатқа ұшырады. Сенат депутаты, бұрынғы Қорғаныс министрi Мұхтар Алтынбаевтың айтуынша, ұшақтың құлауына жанармайды дайындаудағы олқылықтар себеп болуы мүмкiн, деп хабарлайды BNews.kz.

 

«Бұл сирек болатын жағдай. Қозғалтқыштың екеуiнiң тоқтауы бұрынғы кезбен салыстырсақ болмайтын жағдай деуге болады», - дейдi М.Алтынбаев.

Бұрынғы Қорғаныс министрi ұшқыштың дайындығы жақсы екенiн атап өттi.

«Ұшқыштың дайындығы жақсы екен. Екi қозғалтқыш тоқтағанда, саспай, ұшақты елдi мекеннен алып кеттi. Басқарылмай қалғаннан кейiн, ұшақты тастап, секiрген. Аталған күрделi жағдайда нұсқаулық бойынша дұрыс iс-қимыл жасаған. Ұшқыш аман қалды», - дейдi депутат.

Сенатордың айтуынша, әуе апатына жанармай жүйесi немесе жанармайды дайындаудағы олқылықтар себеп болуы мүмкiн.

«Өйткенi қыста жанармайды дайындаудың өз ерекшелiктері бар. Осы жұмыс бәрi жасалды ма, жоқ па - осының бәрiн тексеру керек. Ұшақтарды да, жанармайды да тексеру қажет», - дедi М.Алтынбаев.

Оның сөзiнше, Су-27 алдыңғы қатарлы ұшақтардың бiрi. Сондықтан бағасы да арзан емес. Бүгiнде Қазақстанда осындай 30-дан астам ұшақ бар. Әуе апатына байланысты республикада барлық әскери ұшақтар уақытша тоқтатылып, тексерiс жүргiзiледi.

Естерiңiзге сала кетейiк, 21 желтоқсанда түнгі оқу-жаттығу кезінде Су-27 әскери ұшағы апатқа ұшырады. Ұшақ Талдықорғаннан шамамен 25 шақырым жерде құлаған. Ұшқыш майор Әдiлбек Ысқақов бар мүмкіндігін салып, ұшақты елді мекеннен аулаққа алып кетіп, өзі катапультпен секіріп кеткен.

Қазіргі уақытта ұшқыш ауруханада, оның жағдайы қанағаттанарлық. Оқиғаның себебі мен мән-жайын ҚР Қорғаныс министрі тағайындаған комиссия анықтап жатыр.

Loading...
тақырыпты жалғастыруға «»