Әбдіқалықова Алғыс айту күніне орай салтанатты іс-шараларға қатысты - Жаңалықтар | BNews

Әбдіқалықова Алғыс айту күніне орай салтанатты іс-шараларға қатысты

01 наурыз, 2018, 18:04 1814 Астана
Әбдіқалықова Алғыс айту күніне орай салтанатты іс-шараларға қатысты

Мемлекеттік хатшы қатысқан салтанатты іс-шараларды Қазақстан халқы Ассамблеясы ұйымдастырды.

Қазақстан Республикасының Мемлекеттік хатшысы Гүлшара Әбдіқалықова Алғыс айту күніне орай Қазақстан халқы Ассамблеясы ұйымдастырған салтанатты іс-шараларға қатысты, деп хабарлайды BNews.kz Ақорданың баспасөз қызметіне сілтеме жасап.

Іс-шараларға Парламент Мәжілісінің депутаттары, мемлекеттік органдардың басшылары, Қазақстан халқы Ассамблеясының, этно-мәдени және жастар бірлестіктерінің, аналар кеңесінің, қоғамдық келісім кеңесінің мүшелері, сондай-ақ ғылыми-шығармашылық және зиялы қауым өкілдері, меценаттар, қуғын-сүргінге ұшырағандар мен Қазақстанға жер аударылғандардың ұрпақтары және баспасөз қызметкерлері қатысты.

Мемлекет басшысының Қазақстан халқы Ассамблеясының XXV сессиясында берген тапсырмаларын орындау және "Рухани жаңғыру" бағдарламасын жүзеге асыру аясында Қазақстан халқы Ассамблеясының мультимедиялық порталы мен "Қазақстан халқы" интерактивті тарихи картасының таныстырылым рәсімдері жасалып, "Мың алғыс" атты салтанатты концерт өткізілді.

Концертті ашқан Мемлекеттік хатшы Қазақстан Президенті Нұрсұлтан Назарбаевтың Алғыс айту күніне байланысты халыққа арналған құттықтау сөзін оқып берді.

Онда қиын-қыстау жылдардағы адамгершілік пен имандылық үстемдігінің жадымызда болуы Қазақстан халқын біріктіреді деп атап өтілген. Мейірімділік, өзара көмек пен бір-біріне деген құрмет барлық қазақстандықтар қастерлейтін әрі мақтан тұтатын достық пен ынтымақтың бірегей атмосферасын қазақтың киелі топырағында қалыптастыруға мүмкіндік берді. Өз отандастарымызға және туған өлкемізге деген шынайы алғыс сезімі осы мерекеге ерекше әрі терең мағына береді. Сондықтан Алғыс айту күнінің басты мәні – тарихи жадыны сақтау, ұрпақтар сабақтастығы мен ел бірлігін нығайту.

Құттықтау сөзден кейін Гүлшара Әбдіқалықова Қазақстан халқы Ассамблеясының "Қайырымды көршілерге рахмет!" атты республикалық акциясын бастап беріп, оның түрлі этнос пен дін өкілдерін, барлық қазақстандықтарды жақындастыра түсуге бағытталатынын айтты.

Мемлекеттік хатшы көрші отырған үйлер, аудандар, қалалар және өзге де елді мекендер тұрғындарының кездесулерін өткізуге шақырды. Бұл отандастарымыздың бір-бірімен танысып, жақынырақ білісуі үшін, көмектескеніне ризашылық білдіріп, өкпе-ренішті кешіру үшін және игі тілек айту үшін қажет.   

Айта кетейік, Алғыс айту күні мерекесі Қазақстан Республикасы Президентінің 2016 жылғы 14 қаңтардағы №173 Жарлығымен бекітілді.

Алғыс айту күніне орай республика бойынша 3,4 мың елді мекенде 2,5 миллионнан астам адамның қатысуымен 10 мыңға жуық  іс-шара өтеді. 19-23 ақпан күндері елімізде Қазақстан киносының апталығы өтті. Этномәдени бірлестіктер ақпан-наурыз айларында республикалық Достық үйлері базасында мерекелік іс-шаралар мен қайырымдылық акциялар өткізеді. Қазақстанда тұратын түрлі этностар мен жергілікті қауымдастық өкілдерін жақындастыруға бағытталған "Қайырымды көршілерге рахмет!" атты республикалық акцияның өткізілуі осы мерекенің биығы жаңа дәстүрі болып табылады.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар