Бақыт Сұлтанов Астана әкімі болып тағайындалды

11 қыркүйек, 2018, 11:25 2047 Астана
Бақыт Сұлтанов Астана әкімі болып тағайындалды

Астананың бұрыңғы әкімі Әсет Исекешев Қазақстан Республикасы Президенті Әкімшілігінің басшысы қызметін атқарады.

Мемлекет басшысының Жарлығымен Бақыт Тұрлыханұлы Сұлтанов Астана қаласының әкімі қызметіне тағайындалды, деп хабарлайды BNews.kz Ақорданың Твиттердегі ресми парақшасына сілтеме жасап. 

Ақорданың ресми сайтында хабарланғандай, Қазақстан Президенті Бақыт Сұлтановты Астана қаласының әкімі қызметіне тағайындау және ҚР Қаржы министрі қызметінен босату жөнінде Жарлыққа қол қойды.

"Бақыт Тұрлыханұлы Сұлтанов Астана қаласының әкімі болып тағайындалсын, ол Қазақстан Республикасының Қаржы министрі қызметінен босатылсын", - делінген хабарламада.

Бақыт Тұрлыханұлы Сұлтанов 1971 жылы Алматы қаласында туған. Қазақ ұлттық техникалық университетін және Қазақ мемлекеттік басқару академиясын бітірген. Мамандығы инженер-электрик, экономист.

1994-1997 жж. - Қазақстан Республикасы Қаржы министрлігінің жетекші экономисі, мемлекеттік бағалы қағаздар басқармасы бастығының орынбасары - бөлім бастығы. 1996-1997 жж. - Қазақстан Республикасы Қаржы министрлігі жанындағы Қазынашылық мемлекеттік қарыз және кассалық қаржы басқармасы бастығының орынбасары. 1997-1998 жж. - Қазақстан Республикасы Қаржы министрлігі бюджеттік департаменті директорының орынбасары, мемлекеттік сатып алу жөніндегі департамент директоры.

1998-1999 жж. - Қазақстан Республикасы Қаржы министрлігі Қазынашылық департаменті директорының орынбасары. 1999-2002 жж. - Қазақстан Республикасы Қаржы министрлігі бюджеттік департаменті директорының орынбасары, мемлекеттік бюджет департаменті директорының орынбасары, директоры.

2002-2003 жж. - Қазақстан Республикасы Экономика және бюджеттік жоспарлау министрлігі бюджеттік саясат департаментінің директоры. 2003-2006 жж. - Қазақстан Республикасы Экономика және бюджеттік жоспарлау министрінің орынбасары. 2006-2007 жж. - Қазақстан Республикасы Статистика жөніндегі агенттігінің төрағасы, Қазақстан Республикасы Қаржы министрінің орынбасары. 2007-2010 жж. - Қазақстан Республикасы Экономика және бюджеттік жоспарлау министрі.

Мемлекет басшысының 2010 жылғы наурыздағы Жарлығымен Қазақстан Республикасы Президентінің көмекшісі болып тағайындалды.

2012 жылдың қаңтар-қараша аралығында Мемлекет басшысының Жарлығымен Қазақстан Республикасы Президентінің Әкімшілігі Басшысының орынбасары қызметін атқарды. 2012 жылы қарашасынан бастап қазірге дейін ҚР Қаржы министрі болып қызмет атқарды.

"Құрмет" орденімен және екі медальмен марапатталған. Отбасылы, үш бала тәрбиелеп отыр.

Бұған дейін хабарлағанымыздай, Астана қаласының бұрынғы әкімі Әсет Исекешев Қазақстан Республикасы Президенті Әкімшілігінің басшысы қызметіне тағайындалды.

Ал Әділбек Жақсыбеков зейнеткерлік жасқа толуына байланысты ҚР Президенті Әкімшілігінің басшысы қызметінен босатылып, "Цесна" корпорациясы" АҚ Директорлар кеңесінің басшысы болып тағайындалды. 

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар