Астанада болашақ аналар арасында сұлулық байқауы өтті

19 желтоқсан, 2018, 10:55 1755 Астана
Астанада болашақ аналар арасында сұлулық байқауы өтті

Финалда 19 бен 35 жас аралығындағы тоғыз әйел бақ сынады.

Болашақ аналар арасындағы сұлулық байқауы елордада алғаш рет өткізіліп отыр. 31 жастағы Раушан Тілекуенова "Miss Аяулы Ана - 2018" байқауының жеңімпазы атанды, деп хабарлады елорда әкімдігінің ресми сайты. Финалда 19 бен 35 жас аралығындағы тоғыз әйел бақ сынады.

Болашақ аналар байқау барысында шығармашылық қабілеттерін паш етіп, түрлі елдердегі жүктілік пен босану үрдісі туралы әңгімелеп, би билеп, ән айтып, кешкі көйлектердің үлгісін көрсетті.   Ұйымдастырушылар болашақ әкелер туралы да ұмытқан жоқ. Олардың баланы жаялыққа орау жылдамдығы сыналды.

"Біз жүктіліктің 28 аптасына дейінгі әйелдерді іріктеп алдық. Бірінші кезеңде болашақ аналар осы байқауға не үшін қатысқысы келетіні туралы мотивациялық хат жазды. Екінші айналымда олар өз туысқандарымен бейнеролик түсірді", – дейді акушер-гинеколог Айжан Ауанасова.

Қатысушылар байқауға бір жарым ай бойы дайындалды. Болашақ аналар йогамен айналысып, вокалдық әрі хореографиялық шеберліктерін шыңдады.  Байқау қорытындыларына сәйкес Раушан Тілекуенова байқаудың жеңімпазы атанды. Вице-мисс атағын Жұлдыз Шолақова мен Ғалия Сағым өзара бөлісті. Ал "Көрермен көзайымы" атағына Раушан Сатмағанбетова лайық деп танылды. Іс-шараны "Аяулы Ана" қоғамдық бірлестігі ұйымдастырды.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар