Астанада өз елінің бірегей патриоттары марапатталды

05 желтоқсан, 2018, 14:57 1689 Астана
Астанада өз елінің бірегей патриоттары марапатталды

Қазақстаннан жалпы 19 адам "Жыл патриоты" атағын иеленді.

Астана қаласындағы "Қазақстан" орталық концерт залында дәстүрлі Республикалық Патриоттар форумы өтті, деп хабарлады ҚР Мәдениет және спорт министрлігінің баспасөз қызметі.

Мерекелік форумның ашылу салтанатында сөз сөйлеген ҚР Мәдениет және спорт министрі Арыстанбек Мұхамедиұлы мемлекеттік рәміздер мемлекетіміздің ең қадірлі символдары екенін айтып өтті.

"Мемлекеттік рәміздер мемлекетіміздің ең қадірлі, ең қастерлі символдары болып табылады. Аспан түстес байрағымыздың, Елтаңбамыздың және Гимніміздің әрбір элементінде Елбасының, сонымен қатар осы іске атсалысқан әрбір азаматтың Отанға деген махаббаты мен арман-мұраттары жатыр", - деп атап өтті Арыстанбек Мұхамедиұлы.

Салтанатты шараға Қазақстанның барлық өңірінен 200 делегат қатысты. Олардың ішінде өз кәсібінің үздік өкілдері, ел үшін қалтқысыз қызмет етіп жүрген ҚР Парламенті Мәжілісінің депутаттары, орталық мемлекеттік органдардың өкілдері, ұйым басшылары, этно-мәдени орталықтардың жетекшілері, үкіметтік емес және жастар ұйымдарының жетекшілері, еңбек ардагерлері мен зиялы қауым және бұқаралық ақпарат құралдарының өкілдері бар.

Форум барысында қатысушылар өздерінің жетістіктері жайлы айтып, мемлекеттік рәміздер саласында атқарып жатқан қызметтері туралы өзара пікір алмасты.

Сонымен қатар, Мемлекет басшысының "Қазақ тілі әліпбиін кириллицадан латын графикасына көшіру туралы" Жарлығының аясында ағымдағы жылы Мемлекеттік Елтаңбамыздағы "Қазақстан" сөзін латын графикасында жазу туралы "Қазақстан Республикасының мемлекеттік рәміздері туралы" Конституциялық заңына өзгеріс енгізу бойынша тиісті жұмыстар жүргізіліп, Елбасы тарихи шешімге қол қойғандығы қатысушылар тарапынан аталып өтілді.

Форумда түрлі салада еселі қызмет етіп, күнделікті еңбегімен және үлгілі ісімен халықтың ықыласына бөленген, мемлекеттік рәміздерді насихаттауда шынайы сүйіспеншілігін көрсеткен еліміздің 17 өңірінің азаматтары Алматы қаласынан Қасымов Ерболат, Ақмола облысынан Айткужинова Алма, Шымкент қаласынан Қалиева Меруерт, Ақтөбе облысынан Кұспанов Мербол, Алматы облысынан Садуақас Бекарыс, Атырау облысынан Измағанбетов Берік, Батыс Қазақстан облысынан Шудабаев Серікқали, Жамбыл облысынан Саурықов Ерболат, Қарағанды облысынан Даткин Ерканат, Егенов Жасулан, Қостанай облысынан Жакып Калкаман, Қызылорда облысынан Баймаханов Қайраддин, Маңғыстау облысынан Апбасов Ануарбек, Павлодар облысынан Молдабеков Женис, Солтүстік Қазақстан облысынан Азімбаева Рахат, Түркістан облысынан Қозыбаев Алдияр, Шығыс Қазақстан облысынан Әубәкірова Алма, Қазақстан халқы ассамблеясынан Ким Вячеслав және Батырхан Қуантбекті Мәдениет және спорт министрі Арыстанбек Мұхамедиұлы "Жыл патриоты" номинациясымен марапаттап, оларға бағалы сыйлықтар табыстады.

Іс-шара патриоттық концертпен аяқталды.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар