Атырау облысында білім және мәдениет мекемелерінің атаулары өзгертілді

30 Января, 2019, 18:56 2266
Атырау облысында білім және мәдениет мекемелерінің атаулары өзгертілді |  | BNews.kz

2019 жылғы 24 қаңтарда Атырау облысындағы кейбір білім мен мәдениет мекемелерінің атауларын ауыстыру туралы ҚР Үкіметінің Қаулысы шықты.

Атырау облысында бірқатар білім және мәдениет мекемесінің атаулары өзгертілді, деп хабарлайды BNews.kz.

Облыстық Өңірлік коммуникациялар қызметінің мәліметінше, Исатай ауданында мектеп пен мәдениет үйінің атауы ауысты. "Чапаев атындағы жалпы білім беретін бастауыш мектеп" енді қазақтың ұлы ақыны Жамбылдың есімімен аталатын болады. Ұлы ақынның туындылары көптеген тілдерге аударылған. Қытай, Ұлыбритания, Чехия, Словакия секілді елдерге Жамбылдың өлеңдері таныс. Оны шын мәніндегі халық ақыны деп атауға негіз бар.

Тұщықұдық ауылындағы мәдениет үйі енді "Нариман Үлкенбайұлы атындағы мәдениет үйі" деп аталады.
Көрнекті қоғам қайраткері, өнер майталманы Нариман Үлкенбайұлы қазақ мәдениетіне, театр өнеріне ерекше еңбек сіңірді. 60 жылдары Аққыстау поселкесінде ашылған драма үйірмесінде қойылымдарда ойнаған. 1968 жылы Аққыстау мәдениет үйінің басшысы және аудандық халық театрының көркемдік жетекшісі болды. 2000 жылдары Атырау облыстық тарихи-өлкетану музейін басқарып, оның дамуына үлкен үлес қосты.

Махамбет ауданындағы Чкалов атындағы орта мектеп Ахмет Байтұрсынұлының есімін иеленді. Қоғам және мемлекет қайраткері, "Алаш" партиясының мүшесі, ағартушы, ғалым-лингвист, әдебиеттанушы, түрколог, ақын және аудармашы ретінде Ахмет Байтұрсынұлын қазақ халқы "Ұлт ұстазы" деп біледі.

Индер ауданында "Гребенщик орта мектебі" атауы "Әбіш Кекілбайұлы атындағы орта мектеп" болып өзгерді. Белгілі мемлекет және қоғам қайраткері, Қазақстанның халық жазушысы, мемлекеттік сыйлықтың иегері Әбіш Кекілбайұлы әлем әдебиетінің мол қазынасын қазақ тіліне аударуға ерекше еңбек сіңірген. Ол Г. Мопассанның "Пьер мен Жан", "Өмір", Ш. Айтматовтың "Ерте қайтқан тырналар" романдарын қазақ тіліне аударды. Әр жылдары халық депутаты болып сайланды, ҚР Мемлекеттік хатшысы лауазымын атқарды.

Үкімет Қаулысымен "Атырау аграрлы-техникалық колледжіне" Оңайбай Көшековтің есімі берілді. Мемлекет қайраткері Оңайбай Көшеков Кеңес кезінде Қазақстан Компартиясы Гурьев облыстық комитетінің бірінші хатшысы қызметін атқарған. Ол облысты басқарған кезде Теңіз кен орны ашылып, Атырау-Ганюшкино жолы салынды, Атырау-Мақат-Құлсары, Индер-Сағыз-Миялы жолдары, Мақат-Индер темір жолы салынып, аймақтың ауыл шаруашылығы саласы қарқынды дамыды.

Айта кетейік, Атырау облысындағы кейбір білім мен мәдениет мекемелерінің атауларын ауыстыру туралы Үкімет Қаулысына ҚР Премьер-министрі Бақытжан Сағынтаев 2019 жылғы 24 қаңтарда қол қойды. 

Рекомендуем
Димаш Құдайберген "The World's Best" шоуында америкалық тыңдармандарды таңдандырды 13849

Похожие новости