Данияр Елеусінов спорттық мансабын кәсіпқой бокста жалғастыратын болды - Жаңалықтар | BNews

Данияр Елеусінов спорттық мансабын кәсіпқой бокста жалғастыратын болды

03 наурыз, 2018, 19:58 2975
Данияр Елеусінов спорттық мансабын кәсіпқой бокста жалғастыратын болды

Спортшы америкалық Boxing Star менеджерлік компаниясымен келісімшартқа қол қойды.

Қазақстандық боксшы, Олимпиада чемпионы Данияр Елеусінов мансабын кәсіпқой бокста жалғастырады. Спортшы америкалық Boxing Star менеджерлік компаниясымен келісімшартқа қол қойды, деп хабарлайды BNews.kz Vesti.kz-ке сілтеме жасап.

Спорттық басылым ақпараты бойынша боксшыны америкалық компанияның ұсынысы қанағаттандырған. Осыған дейін отандасымыз аустралиялық MJA Entertainment's компаниясымен келісімге қол қойып, кейіннен шартты бұзған еді.

Данияр Елеусіновтің жаңа келісімшарты жайлы америкалық компанияның бас директоры Зия Алиев айттты.

"Компания боксшының жаттығуы, тұрғылықты орны мен өзге де қажеттіліктерін өз қарауына алады. Даниярдың негізгі жаттықтырушысы, әкесі Марат Елеусінов болады. Оған америкалық жаттықтырушы көмектеседі. Сондай-ақ компания боксшының имидждік жұмысына да көңіл бөледі. Нағыз бренд қалыптастырғымыз келеді", - дейді Зия Алиев.

Компания мен боксшы 5 жылдық келісімшартқа қол қойған. Зия Алиев тағы бір қазақстандық боксшы Иван Дычкоға да назарын салуда.

Айта кетейік, Данияр Елеусіновтің кәсіпқой боксқа ауысатыны өткен жылы айтылған. Келісімшартқа қол қойғаны да хабарланған. Кейіннен боксшы әуесқой бокста қалатынын айтып, ұлттық құрамаға оралған. Жақында ғана Алматы облысындағы AIBA академиясында Ресей, Өзбекстан құрамаларына қарсы өткен тәжірибені шыңдау турниріне де қатысқан болатын.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар