Димаш Құдайберген Лондонда шетелдік жетекші БАҚ өкілдеріне сұхбат берді

23 қараша, 2018, 13:01 3380
Димаш Құдайберген Лондонда шетелдік жетекші БАҚ өкілдеріне сұхбат берді

Қазақстандық танымал әнші Лондондағы керемет концертінен соң, шетелдік БАҚ өкілдеріне бірқатар сұхбат берді және Қазақстан туралы айтып берді.

"Indigo at the O2" концерт залындағы триумфынан соң, Димаш Құдайберген халықаралық жетекші БАҚ өкілдерімен кездесу үшін Лондонда тағы 2 күн болып, бірқатар сұхбат берді, деп хабарлайды BNews.kz ҚР Мәдениет және спорт министрлігінің баспасөз қызметіне сілтеме жасап.

Димаш әр сұхбатында Қазақстан туралы, ұлттық салт-дәстүрлер туралы қазақ тілінде айтып берді. Әншінің айтуынша, ол әлемге туған елінің мәдениетін ана тілінде жеткізетінін мақтан тұтады. Димаш Құдайберген Лондонда өткен өзінің алғашқы жеке концертін ұйымдастырушы – ҚР Мәдениет және спорт министрлігіне алғыс білдірді.

Сондай-ақ, осы күндері әнші Ұлыбритания мен Солтүстік Ирландия Біріккен Корольдігіндегі Қазақстан Республикасының Төтенше және Өкілетті елшісі Ерлан Ыдырысовпен кездесті. Елші мырза Димаштың бүкіл әлемде Қазақстан елшісі екенін және еліміздің беделін әлемдік деңгейде көтеріп жүргенін атап айтты.

Сол күні әнші Лондондағы қазақстандық студенттермен кездесті. Кездесу Ұлыбритания мен Солтүстік Ирландия Біріккен Корольдігіндегі Қазақстан Республикасы елшілігінде өтті. Музыкантпен кездесуге сан алуан саланың болашақ мамандары келді. Олар тосын фотосессия өткізіп, өздерін қызықтырып жүрген сұрақтарын қойды. 

Елшіліктің дәлізінде Димаш жиналғандарға арнап, фортепианода бірнеше сүйікті шығармасын орындап берді. 

Әлемдік жетекші редакцияларға арналған сұхбат сериясын Димаш Құдайберген BBC телевизиясы мен радиосын аралаудан бастады. Британдық ВВС жалпы ұлттық қоғамдық телерадио таратылымы ұйымының студиясында Димаш қазақ тілінде бірегей сұхбат беріп, өз шығармашылығымен бөлісті. "BBC World Service" радиостанциясында музыкант "Cultural Frontline" сенбілік шоуы үшін өзінің табыс жолындағы тарихымен бөлісті. Бағдарлама жүргізушісі Тина Дахели әншімен оның музыкалық жолы туралы әңгімелесті. Радиостанцияның жаһандық апталық аудиториясы 75 миллион тыңдарманнан тұрады. 

Британдық "The Independent" интернет-баспасына берген сұхбатында қазақстандық өз музыкасы мен шығармашылық жолы туралы әңгіме құрды. Сұхбат радиоға арналған подкаст түрінде өтті. Тілшіні қазақстандық әншінің қай жерде демалғанды ұнататыны қызықтырып, осыған қатысты сұрақ қойды. Димаш жұмыс барысымен барған мемлекеттерімен бөлісіп, шетелде ешқашан демалмағанын айтты.

"Қазақстанда Ақтөбе деген шағын қала бар. Сол жерде менің отбасым, ата-әжем, бүкіл туысым тұрады. Сол жерде мен керемет демаламын", - деп әнші ашық айтты.

Одан бөлек, жас әнші Лондондық "Candid" журналының тілшісі Адам Зорганимен кездесті. Адам "Indigo at the O2" залында өткен Димаштың концертінде болғанын және қазақстандықтың шығармасына тәнті екенін айтты.

"1883" интерактивті мультимедиялық платформасына Димаш өз шығармасы мен болашаққа құрған жоспары туралы айтып берді. Портал редакциясы сәнді музыка, кино, саяхат және өнер әлеміндегі соңғы жаңалықтарды таратумен айналысады.

Қазақстандық әнші Ресейлік ТАСС жетекші ақпараттық агенттігінің тілшілерімен кездесу өткізді. Сұхбат барысында Димаш Игорь Крутоймен бірге жасап жатқан жұмыстары және ресейлік композитормен болашаққа құрған шығармашылық жоспарлары туралы толық ақпарат берді.

Британдық танымал фотограф Майкл Дональд Димаш Құдайберген үшін фотосессия жасады. Майклдың жұмыстарының қатарында америкалық кинорежиссер Мартин Скорсездің, "The Rolling Stones" рок-тобының вокалисті Мик Джаггердің, бразилиялық футболшы Пеле мен басқа да атақты адамдардың фотосуреттері бар.

Сондай-ақ, осы күндері әнші Ұлыбританиядағы "World History Archive" Бас директоры Александр Голдбергпен кездесті. Александр Димаш Құдайберген туралы автобиография жазуды жоспарлап отыр. Кездесу жанға жайлы жағдайда өтті, ол Димашқа қазақ домбырашысы бейнеленген фотосуретті сыйға тартты. Бұл жұмыстың атауы жоқ. Алайда, ол 1890 жылы жасалғаны белгілі.

Қазақстандық теңдессіз әншінің шығармасы тілшілердің ғана емес, Ұлыбританиялық жұлдыздардың да қызығушылығын танытты. Концерт көрермендері қатарында жергілікті жұлдыздар да болды. Димаш өнер көрсеткен күні әншіге қолдау көрсету үшін, Англияға атағы жайылған әнші Талия Сторм келді. Ол достарымен бірге Димаштың алдағы концертіне сәттілік тіледі. Англиялық әнші концерт барысын өз аккаунтына жазылғандарға арнап, әлеуметтік желідегі парақшасында көрсетті. Концерттен соң олар хат алмасып, араларында достық байланыс бастау алды.

Лондондағы естен кетпес күндерден соң, Димаш Құдайберген отанына оралды.

19 қарашада Лондонда Димаш Құдайбергеннің алғашқы жеке концерті - "DQ" бірегей шоуы өткенін естеріңізге саламыз. "Indigo at the O2" концерт залы толығымен толтырылды, ал көрермендер әлемнің 45 елінен келді.  

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар