Елбасы теміржол саласы мен мұнай-газ кешені құрал-жабдықтарын шығаратын зауытқа барды

09 қараша, 2018, 14:39 294 Солтүстік Қазақстан облысы
Елбасы теміржол саласы мен мұнай-газ кешені құрал-жабдықтарын шығаратын зауытқа барды

Сондай-ақ, Мемлекет басшысы Солтүстік Қазақстан облысының аграрлық әлеуетіне тоқталып, бұл өңірде ауыл шаруашылығы саласын дамыту қажеттігін айтты.

Қазақстан Президенті Петропавл қаласына келген соң, темір жол автоматикасы, телемеханика, байланыс, қауіпсіздік жүйесі құрылғыларын және мұнай-газ кешені кәсіпорындарына арналған құрал-жабдықтар шығаруға маманданған зауытты аралап көрді, деп хабарлайды BNews.kz Ақорданың ресми сайтына сілтеме жасап.

Мемлекет басшысы Солтүстік Қазақстан облысының әкімі Қ.Ақсақаловтың өңірдегі әлеуметтік-экономикалық ахуалдың дамуы, индустриялық жобалардың іске асырылуы және жолдау аясындағы тапсырмалардың орындалуы жөніндегі есебін тыңдады.

Нұрсұлтан Назарбаев облыс әкімінің баяндамасынан кейін Қазақстан Республикасы мен Ресей Федерациясының өңіраралық ынтымақтастығының форумына әзірлік аясында аймақты дамыту бағдарламасының тиімді іске асырылып жатқанын атап өтті.

"Петропавл қаласын көркейту мақсатымен көп жұмыс атқарылды. Облыстың экономикалық көрсеткіштері қалыпты. Өсім қарқыны республика бойынша орташа көрсеткіштен жоғары", – деді Елбасы.

Сонымен қатар, Мемлекет басшысы облыстың аграрлық әлеуетіне тоқталып, бұл өңірде ауыл шаруашылығы саласын дамыту қажеттігін айтты.

"Еліміздегі ауыл шаруашылығы өнімдерін өңдеу ісі көңіл көншітерліктей емес. Мен ауыл шаруашылығындағы еңбек өнімділігін екі есе көтеру жөнінде міндет қойдым. Бұл сіздердің облыстарыңызға тікелей қатысты. Қайта өңдеу мен экспортты ілгерілету арқылы ғана өнімділікті арттыруға болады. Сіздер үшін жаңа тұтыну нарықтары ашылды", – деді Қазақстан Президенті.

Елбасы тұрғын үй және инфрақұрылым нысандарын салу, әлеуметтік бағдарламаларды іске асыру жұмыстарының нәтижелеріне де тоқталды. Атап айтқанда, 2018 жылы өңірдің 6 мыңнан астам тұрғыны баспанамен қамтамасыз етіліп, 150 мыңнан астам жұмысшының жалақысы көтеріледі, сондай-ақ өңірлік маңызы бар жолдар жөндеуден өткізіледі.

Соңында Нұрсұлтан Назарбаев өңір жұршылығымен кездесті. Облыс тұрғындары әлеуметтік салаға қатысты бағдарламалар қабылдап,  халыққа ұдайы қамқорлық көрсетіп келе жатқаны үшін Мемлекет басшысына алғыс білдірді.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар