Елімізде "Жаңғыру жолы" республикалық жастар қозғалысы құрылды - Жаңалықтар | BNews

Елімізде "Жаңғыру жолы" республикалық жастар қозғалысы құрылды

15 наурыз, 2018, 16:54 3288 Астана
Елімізде

"Рухани жаңғыру" бағдарламасының міндеттерін жүзеге асыруға үлес қоса алатын белсенді жастардың басын біріктіру қозғалыстың негізгі миссиясы болуға тиіс, деп хабарлады Ақорданың ресми сайты.

Қазақстан Республикасының Мемлекеттік хатшысы Гүлшара Әбдіқалықова Қазақстан халқы Ассамблеясының "Жаңғыру жолы" атты республикалық жастар қозғалысының құрылтайшылық конференциясына қатысты.

Іс-шараға сондай-ақ Парламент Мәжілісінің депутаттары, мемлекеттік органдардың, республикалық жастар бірлестіктерінің және ҚХА жастар қанатының басшылары, Қазақстан халқы Ассамблеясының мүшелері, "Қазақстанның 100 жаңа есімі" жобасының жеңімпаздары қатысты.

Конференцияға қатысушыларға арналған сөзінде Мемлекеттік хатшы Г.Әбдіқалықова Елбасы Н.А.Назарбаевтың "Президенттің бес әлеуметтік бастамасы" атты үндеуіндегі: "Өсіп-өркендеп келе жатқан Қазақстан дегеніміз – ең алдымен өз-өзіне сенімді, мемлекеттің қорғауы мен қолдауын сезінетін, сондай-ақ оған лайықты түрде және патриотизм арқылы жауап беретін адамдар екеніне нық сенімдімін" деген сөздерін атап өтті.

Бұл бастамалар "әлеуметтік мемлекет" туралы конституциялық норманы нақты жаңа мазмұнмен толықтыра түседі. Олардың жүзеге асырылуы ұлттық әл-ауқатты арттыруға, әлеуметтік бірлікті нығайтуға септігін тигізеді.

Мемлекеттің жалпы табыстылығы көбінесе өзгерістер үштағанының өзегі болып табылатын "Рухани жаңғыру" бағдарламасының орындалуына байланысты болмақ.

Гүлшара Әбдіқалықова аталған бағдарламаның біраз уақыттан соң ел дамуының барысын айқындауға тиіс жастарға арналғанын айтты.

Сондықтан "Жаңғыру жолы" қозғалысының құрылуы Қазақстанның стратегиялық бағытына жастардың шынайы қолдау білдіруінің дәлелі болып табылады.

"Рухани жаңғыру" бағдарламасының міндеттерін жүзеге асыруға үлес қоса алатын белсенді жастардың басын біріктіру Қозғалыстың негізгі миссиясы болуға тиіс.

Конференция барысында қатысушылар Президенттің бес әлеуметтік бастамасын, қоғамдық сананы жаңғырту бағдарламасының негізгі бағыттарын талқылап, "Жаңғыру жолы" қозғалысының 2018-2020 жылдарға арналған стратегиясын және басқа да құжаттарды бекітті.   

Конференция соңында Мемлекеттік хатшы Гүлшара Әбдіқалықова Қазақстан халқы Ассамблеясының "Жаңғыру жолы" республикалық жастар қозғалысының жолы даңғыл, табысты әрі креативті болуына тілектестік білдірді.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар