Халықаралық іздестіру жарияланған қазақстандық Болгариядан экстрадицияланды 

7 ақпанда Қазақстанның Бас прокуратурасы және ІІМ Интерполы Максим Леонтьевті қылмыстық жауаптылыққа тарту үшін Болгариядан экстрадициялады, деп хабарлайды BNews.kz ҚР Бас прокуратурасының баспасөз қызметіне сілтеме жасап.

"Ұсталған азамат 2012-2017 жылдар аралығындағы кезеңде  Қарағанды облысы Ақтау қаласындағы "Central Azia Cement" АҚ-да өзінің қызметтік жағдайын пайдалана отырып, адамдар тобында алдын ала сөз байласу арқылы кәсіпорынның 382 млн теңге сомасына ақшалай қаражатын жымқырғаны үшін күдікті", - делінген хабарламада.

Максим Леонтьев қылмыстық қудалау органдарынан жасырынып үлгерген, осыған байланысты оған халықаралық іздестіру жарияланған.

Ведомствоның мәліметінше, күдіктіні экстрадициялау қазақстандық құқық қорғау органдарының Болгарлық әріптестерімен үйлесімді әрекеттерінің арқасында мүмкін болды.

Қазіргі таңда ол Астана қаласының тергеу изоляторына қамалды.