Қазақстанның қай өңірінен халық көп көшуде? - Жаңалықтар | BNews
Эксклюзив

Қазақстанның қай өңірінен халық көп көшуде?

04 желтоқсан, 12:39 1322 Астана
Қазақстанның қай өңірінен халық көп көшуде?

Биыл жыл басынан бері Қазақстаннан ТМД елдеріне өмір сүру үшін 25 мыңнан астам адам көшкен. Халықтың ең көп көшіп кетуі Қарағанды облысында тіркелген.

Осы жылдың 9 айында Қазақстаннан 28 мыңнан астам қазақстандық шетелге аттанған. Бұл туралы BNews.kz ақпараттық агенттігі жолдаған ресми сауалға берген жауабында ҚР Еңбек және халықты әлеуметтік қорғау министрлігі Еңбек, әлеуметтік қорғау және көші-қон комитеті хабарлады.

«Қазақстан Республикасынан 2017 жылы 9 айда 28 150 адам шетелге шыққан, ұлтқа бөліп қарайтын болсақ: орыстар – 20 464, немістер – 2 331, украиндар – 1 839, қазақтар – 1 043 және татарлар – 697», - делінген Комитет берген жауапта.

Ведомствоның мәліметінше, Қарағанды облысынан халықтың ең көп көшуі анықталған – 4 775 адам, Шығыс Қазақстан облысынан – 3 878, Қостанай облысынан – 3 680, Павлодар облысынан – 3 196, Алматы облысынан – 2 745, Солтүстік Қазақстан облысынан – 2 537, ал Ақмола облысынан – 2 141.

Елден көшкен адамдардың көбі жақын шетелдерге қоныс аударған. Нақтырақ айтар болсақ, ТМД елдеріне – 25 290 адам (89,8%), алыс шетелдерге 2 860 адам (10,2%) кеткен. Қоныс аударғандардың негізгі бөлігі сол елдерді тұрғылықты жер ретінде таңдаған.

Комитет берген ақпарат бойынша, шетелге кеткендердің 68%-ы – еңбекке жарамды тұрғындар, 25,7% – 15 жасқа дейінгі тұрғындар, 6,3% – зейнеткерлер.

«Елден шығып кеткен мигранттардың ішінде 4 816 адамның техникалық білімі болса, 2 672 адамның – экономикалық, 1 745 адамның – педагогикалық, 788 адамның – медициналық, 647 адамның – заң білімі, 538 адамның сәулеттік-құрылыстық білімі бар», - деп хабарлады ведомство.

ҚР Ұлттық экономика министрлігі Статистика комитетінің мәліметінше, еліміз тәуелсіздік алғаннан кейінгі алғашқы жылдары сыртқы миграция  анағұрлым аз болған.

1991-2003 жылдар аралығында орта есеппен жылына 225,5 мың адам елден көшкен. 2004 жылдан 2011 жылға дейін көші-қон айырмасы орнықты болған (жылына 11,7 мың адамға артқан). 2012 жылдан бастап ол көрсеткіш төмендеген (1426 адам). 2016 жылы көшіп келушілер саны көшіп кеткендер санынан асып, айырмашылығы 21 144 адамға азайған. 2016 жылы 2012 жылмен салыстырғанда эмигранттар саны 17,4%-ға өсті, сонымен қатар олардың кету көрсеткішінің ұлғаюы байқалады.

Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас жаңалықтар

`

Серіктестер жаңалықтары