Қызылордада опырылып түскен үй сүріледі - әкімшілік
Жергілікті атқарушы биліктің айтуынша, тұрғындар ескі үй туралы шағымданып ТЖД-не келген емес.
Өткен түнде бір жағы опырылып түскен Қызылордалық көпқабатты үйде 46 отбасы тұрып жатқан, деп хабарлайды BNews.kz.
Қызылорда облысы әкімінің орынбасары Асылбек Шаменовтың айтуынша 1971-ші жылы салынған бесқабатты үй "Жылуэлектрорталығына" тиесілі болған.
"Ғимаратты жақын уақытта тексеріп, күрделі жөндеуді қажет ететін үй ретінде тіркеген. Тұрғын үйдің 103 пәтері бар. Апат кезінде үйдің 43 пәтерінде ғана қоныстанған еді. Опырылып түскен бірінші кіреберісте ешкім тұрмаған. Сондықтан зардап шеккен адамдар жоқ", - деді ол
Қала әкімшілігінің мәліметінше сол үйде тұратын отбасыларды "Мұрагер" мектебінің ішінде орналасқан эвакуациялық орталыққа көшірді. Олар ыстық тамақ, жатар орын, дәрі-дәрмек және қажет заттармен қамтамасыз етілді.
"Бұл бірнеше күнге жасалған шара, содан соң әр отбасын бірнеше ай мерзімге орналастыру амалдарын қарастырамыз, сосын тұрғын үй мәселесінің шарттары бойынша бөлек сөйлесеміз", - деп атап өтті Шаменов.
Құтқарушылар болса, жатақханда тұрып жатқандардың жартысы балалар екенін айтты.
"142 адамның 72-і балалар. Оқиға орнында 80 құтқарушы мен арнайы техника жұмыс істеді. Құтқарушылар тиісті жұмыстарды атқарып, үйінді астында ешкім зардап шекпегеніне көз жеткізді, - деді Қызылода қаласы ТЖД басқармасының бастығы Ербол Әлішеров.
Оқиға орнына Қызылорда облысының әкімі Қырымбек Көшербаев келіп, үйді сүру туралы шешім қабылданғанын айтты. ТЖД опырылып түсудің себептерін анықтауда.
Еске сала кетейік, Қызылордада көпқабатты үйдің бір жағы опырылып түскені туралы осыған дейін хабарлағанбыз.
Біздің Telegram-парақшамызда Қазақстанның маңызды жаңалықтары. Жазылыңыздар!