Қызылордалық 2700-ден астам түлек білім грантына ие болды - Жаңалықтар | BNews

Қызылордалық 2700-ден астам түлек білім грантына ие болды

08 тамыз, 19:13 1653 Қызылорда облысы
Қызылордалық 2700-ден астам түлек білім грантына ие болды

Ұлттық бірыңғай тестілеудің қорытындысымен облыс бойынша түлектердің орташа балы – 85,2%.

Биылғы Ұлттық бірыңғай тестілеуге мектеп бітіруші 7113 түлектің 4742-і қатысқан. Бұл көрсеткіш 66,7%-ды құрап отыр. ҰБТ-ның қорытындысымен облыс бойынша түлектердің орташа балы – 85,2%. Аймақта 100 балдан жоғары жинаған бала саны өткен жылдармен салыстырғанда 30%-ға өскен. Бұл туралы бүгін Өңірлік коммуникациялар қызметінде өткен баспасөз конференциясында облыстық білім басқармасы басшысының орынбасары Ақзира Қасымова мәлімдеді, деп хабарлады BNews.kz.

Оның айтуынша, 2018 жылы білім беру грантын иеленгендердің саны – 2732 болса, 751 түлек "Серпін" бағдарламасы бойынша оқуға түскен, ал облыс әкімінің грантымен 205 жас түлек білім алатын болады.

"Сондай-ақ, грант иегерлерінің 1236-ы техникалық ғылымдар және технология мамандықтары бойынша, 696-сы – педагогикалық мамандық, 283-і ауыл шаруашылығы саласы бойынша оқуға түсті. Сонымен бірге, денсаулық сақтау саласына – 207, қызмет көрсету саласына – 155, әлеуметтік ғылымдар, экономика және бизнес саласына – 113, өнер саласы бойынша 42 грант қызылордалық жастарға тиесілі. Ал меморандум бойынша Ресей Федерациясының алдыңғы қатарлы жоғары оқу орындарының грантын иеленгендер саны – 70. Нақтылап айтқанда, К.А. Тимирязев атындағы ауылшаруашылық академиясы, Мәскеу энергетикалық институты, Санкт-Петербург мемлекеттік өндірістік технология және дизайн университеті бітіруші түлектерді оқуға қабылдайды", - деп баяндады облыстық білім басқармасы басшысының орынбасары.

Сонымен қатар, еліміздегі оқу орындары ректорларының 43 гранты бөлініп, жоғарғы әскери оқу орындарына 39 түлек түскен. Ал шетелдерде білім алу мүмкіндігіне ие болғандардың саны – 29-ды құрады.

"Айта кететін тағы бір жайт, биылғы оқу жылында Астана қаласы ЕврАзЭС Парламентаралық Ассамблея жанындағы Санкт-Петербург университетімен облыс әкімдігі арасында жасалған Меморандумға сай аталған білім ордасы 10 түлегімізге білім беруге әзір", - деді Ақзира Қасымова.

Облыстағы көрсеткіш бойынша Ұлттық бірыңғай тестілеуге қатысып, 100 және оданда жоғары балл жинап білім беру грантын иелене алмаған 102 бала бар. Шекті деңгейден өте алмаған түлектерге тамыз айының 14-19 аралығында және 2019 жылдың қаңтар айынан бастап ақылы негізде қайта тапсыру мүмкіндігіне ие.  

Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас жаңалықтар

`

Серіктестер жаңалықтары