Мемлекет басшысы Ақтөбедегі "ACE Tennis Center" теннис орталығын аралап көрді

15 қазан, 2018, 20:31 2253 Ақтөбе облысы
Мемлекет басшысы Ақтөбедегі

Қазақстан Президенті мемлекет-жекеменшік серіктестік аясында салынған спорт кешенінің жұмысымен танысты.

Елбасы "ACE Tennis Center" теннис орталығына барды, деп хабарлайды BNews.kz Ақорданың ресми сайтына сілтеме жасап.

Қазақстан Президенті мемлекет-жекеменшік серіктестік аясында салынған спорт кешенінің жұмысымен танысып, өңірлерде осындай спорт инфрақұрылымдарының ашылуы салауатты өмір салтын насихаттауға және елімізде теннистің даму деңгейін арттыруға мүмкіндік беретінін атап өтті.

Нұрсұлтан Назарбаев жас спортшылармен әңгімелесіп, теннис добына естелік қолтаңба қалдырды, сондай-ақ осы орталықтың қонақ үй кешені мен басқа да орындарын аралап көрді.

Сондай-ақ, Қазақстан Президенті "Ақтөбе" индустриялық аймағына барды.

Мемлекет басшысына индустриялық аймақта іске асырылып жатқан жобалар, сондай-ақ өнеркәсіп кәсіпорындарын цифрландыру және технологиялық тұрғыдан жаңғырту, облыстың агроөнеркәсіп кешенін дамыту үшін атқарылған жұмыстар туралы мәлімделді.

Ақтөбе облысының әкімі өңірдің биылғы 9 айдағы әлеуметтік-экономикалық дамуының негізгі нәтижелері жөнінде баяндады.

"Есепті кезеңде әлеуметтік-экономикалық дамудың барлық негізгі көрсеткіштері бойынша өсу қарқыны сақталып отыр. Өнеркәсіп өсімі – 105,7 пайыз. Жалпы, қаңтар-қыркүйек айларында өндірілген өнімнің құны 1,3 триллион теңгеден асты. Ауыл шаруашылығы өнімінің жалпы көлемі 167,3 миллиард теңгені немесе 104 пайызды құрады. Осы айда 85 мың шаршы метр тұрғын үйді пайдалануға беру жоспарланып отыр. Бұл былтырғы осы кезеңмен салыстырғанда 22,1 пайызға артық. Биылғы 9 ай ішінде 318 миллиард теңгеден астам инвестиция тартылды", – деді Бердібек Сапарбаев.

Сонымен қатар, өңір басшысы негізгі  мемлекеттік бағдарламалардың, соның ішінде "Бес әлеуметтік бастаманың" жүзеге асырылу барысы жөнінде есеп берді. 

Баяндаманы тыңдаған соң, Нұрсұлтан Назарбаев "Қазақстандықтардың әл-ауқатының өсуі: табыс пен тұрмыс сапасын арттыру" атты халыққа арналған жолдауды тиімді іске асырудың маңыздылығын атап өтіп, облыстағы орташа жалақыны өсіру, жергілікті маңызы бар жолдарды жөндеу және өңірдің, әсіресе Ақтөбе қаласының экологиялық ахуалын жақсарту жөнінде бірқатар нақты тапсырма берді.

Айта кетейік, "Ақтөбе" индустриялық аймағының көлемі 200 гектар жерді қамтиды. Онда инженерлік-коммуникациялық инфрақұрылым, автомобиль және темір жол көліктеріне арналған кірме жолдар бар. Бүгінде мұнда жалпы құны 60,3 миллиард теңге болатын 14 инвестициялық жоба жүзеге асырылуда.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар