Мұнай өндірушілерді озық технологиялармен жұмыс істей білуге үйрету керек – Назарбаев

23 тамыз, 2018, 17:42 1764
Мұнай өндірушілерді озық технологиялармен жұмыс істей білуге үйрету керек – Назарбаев

Нұрсұлтан Назарбаев "Ембімұнайгаз" акционерлік қоғамына барды.

Қазақстан Президенті Атырау қаласындағы "Ембімұнайгаз" акционерлік қоғамына барды, деп хабарлайды BNews.kz Ақорданың ресми сайтына сілтеме жасап.

Мемлекет басшысы Өндірістік үдерістерді қадағалау орталығының жұмысымен танысты. Онда Елбасыға цифрлық зияткерлік кен орнының жүйесі көрсетілді. Бұл нақты уақыт режімінде өнеркәсіп нысандарынан түсетін ауқымды мәліметтерді өңдеуге, шұғыл шешім қабылдау мақсатымен оларға әрі қарай талдау жасауға, сондай-ақ кен орындарындағы өндіру үдерісін жақсартуға мүмкіндік береді.

Нұрсұлтан Назарбаев кен орындарына цифрландыру элементтерін енгізудің арқасында еңбек өнімділігі артып, құрылғыларды жөндеу мерзімінің және бірін-бірі қайталайтын құрылымдардың қысқарғанын айтып, түпкі нәтиже бастапқы шығыннан екі есе және одан да көбірек болатынын атап өтті.

"Мұнай өндірудің қазіргі әдістерімен ғана шектелмей, заманауи тәсілдерді де қолдану қажет. Ең алдымен, қызметкерлерді озық технологиялармен жұмыс істей білуге үйрету керек", – деді Қазақстан Президенті.

"Самұрық-Қазына" акционерлік қоғамы басқармасының төрағасы Ахметжан Есімов Мемлекет басшысына "Ұлттық индустриялық мұнай химиясы технопаркі" арнайы экономикалық аймағы қызметінің негізгі нәтижелері туралы баяндады.

Сонымен қатар, Қазақстан Президентіне Атырау қаласы инженерлік желісінің электронды сызбаларына, ауыл шаруашылығына арналған жерлерге, кең таралған пайдалы қазбалар орындарына және өңірдегі жерлерді пайдалану шарттарына, сондай-ақ мемлекеттік қызметке электронды форматта тапсырыс беруге немесе мемлекеттік органға өтініш жолдауға онлайн-мониторинг жасау үшін мүмкіндік туғызатын Атырау облысының геоақпараттық порталының жұмысы таныстырылды.

Атырау облысының әкімі аталған электронды ресурстың енгізілуі өңірдің инвестициялық тартымдылығын арттыруға, бизнес-процесті автоматтандыруға, мемлекеттік қызмет көрсету сапасын жақсартуға, сондай-ақ сыбайлас жемқорлық қатерін және жерді пайдалану шарттарының бұзылуын азайтуға мүмкіндік беретінін айтты.

Бұған дейін хабарлағанымыздай, Мемлекет басшысы Нұрсұлтан Назарбаев Атырау облысына жұмыс сапарымен келді. Мемлекет басшысы мұнда облыс активімен кеңес өткізеді.

Мемлекет басшысы "Карат" жауапкершілігі шектеулі серіктестігінің "Дәулет" жеке индустриялық аймағында болып, нан және макарон өнімдерін шығару жөніндегі цехты аралап көрді және осы жерде өндірілетін дайын өнім үлгілерімен танысты.

Біздің Telegram-парақшамыздаҚазақстанның маңызды жаңалықтары. Жазылыңыздар!

Атырау облысы #Нұрсұлтан Назарбаев #жұмыс сапары #мұнай

Читайте также

Похожие новости