Назарбаев Түркі әлеміндегі ең танымал тұлға атанды

31 қазан, 2018, 10:19 1981
Назарбаев Түркі әлеміндегі ең танымал тұлға атанды

"Түркі барометрі" атты еларалық әлеуметтік зерттеулерге 5 елдің азаматтары қатысты.

Бұл туралы "Қазақстан және Орталық Азия: этноәлеуметтік үрдістер мен этномәдени байланыс" атты ҚХА-ның Орталық Азия ғылыми сарапшылық кеңесінің отырысында "Қоғамдық пікір" зерттеу институтының директоры Ботагөз Рақышева мәлім етті, деп хабарлайды BNews.kz Қазақстан халқы Ассамблеясының ресми сайтына сілтеме жасап.

"Бүгін біз еларалық әлеуметтік зерттеудің нәтижелерін ұсынбақпыз. Бұл жоба Халықаралық Түркі академиясына тиесілі. 2017 жылы бастамашылық етілген осы жоба Қазақстан, Қырғызстан, Өзбекстан, Түрікменстан, Түркия және Әзербайжан елдерінің астаналарында іске асырылды. 2018 жылы бұл жоба жалғасын тауып, барша республикаларда жүргізілді. Осы орайда қалалар мен ауылдар да қамтылды. Биыл бұл жұмыстар түркітілдес әлемнің 5 елінде ұйымдастырылды", - деді Ботагөз Рақышева "Түркі барометрі" жобасын таныстыру барысында.

Сауалнама барысында респонденттерден Түркі әлеміндегі беделді тұлғалар туралы сұралған.

"Сауалнама барысында респонденттер өздері білетін адамдар жайында мәлімет берді. Негізінен, әрбір респондент өз елінің Президентін айтып жатты. Алайда барлық 5 елдің азаматтары жалпы жауаптарында екі есімді ерекше білетіндіктерін байқатты. Осы орайда олар Түркі әлемінің маңызды тұлғалары ретінде Мұстафа Кемал Ататүрік пен ҚР Президенті Нұрсұлтан Назарбаевты атады", - деді "Қоғамдық пікір" зерттеу институтының директоры.

Зерттеу шаралары шілде мен тамыз айларында өткізіліп, қыркүйекте Түркі кеңесінің саммитінде таныстырылды.

"Атап айтқанда, "түркітілдес елдердің мәдениетімен қаншалықты таныссыз?" деген сауал қойылды. Осы орайда Әзербайжан мен Қырғызстанның тұрғындары бұл бағыттағы деректерден жақсы хабардар екенін байқатты", - деп тоқталды сарапшы.

Сонымен қатар, сауалнамаға қатысқандар арасында "түркітілдес қай елге жұмысқа, оқуға немесе саяхаттауға барғыңыз келеді?" деген сұрақ қойылған. Бұл тұрғыда адамдар аталған бауырлас елдерге сапарлауға ниетті екенін сөз еткен.

"Бәрінен бұрын біздің тұрғындар осы елдерде саяхаттауға қызығушылық танытты. Жалпы, туризм мен түркітілдес елдерге сапарлау ниеті барлық жерде байқалды. Яғни адамдар жоба аясында қамтылған мемлекеттердің мәдениетімен, салтымен танысуға ерекше көңіл бөліп отыр", - деді Ботагөз Рақышева. 

Айта кетейік, "Түркі барометрі" өзінің сипаты жағынан Еуропа одағының "Еуропа барометрі" зерттеу бағдарламасы мен әлемнің өзге де аймақтарында жүргізілетін ("Афробарометр", "Латынбарометр" т.б.) зерттеулеріне ұқсас.

Мұндағы мақсат - түркі мемлекеттері тұрғындарының Түркі кеңесі тарапынан жүргізілетін интеграциялық процестерге қатысты көзқарастарын, экономикалық, мәдени аспектілерге байланысты ой-пікірлерін бағамдау. Бұдан бұрын хабарланғандай, 2017 жылы қарашада Астанада "Түркі барометрі" жобасы таныстырылды.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар