Назарбаев "Азия-Еуропа" форумының саммитінде бірқатар кездесу өткізді - Жаңалықтар | BNews

Назарбаев "Азия-Еуропа" форумының саммитінде бірқатар кездесу өткізді

Написать нам
19 қазан, 2018, 15:18 3090
Назарбаев 

"Азия-Еуропа" форумының ХІІ саммиті Бельгияда өтіп жатыр.

Қазақстан Президенті Нұрсұлтан Назарбаев Бельгияда өтіп жатқан "Азия-Еуропа" форумының ХІІ саммитінде бірқатар кездесу өткізді, деп хабарлайды BNews.kz Ақорданың баспасөз қызметіне сілтеме жасап.

"Саммит барысында Нұрсұлтан Назарбаев Жапония Премьер-Министрі Синдзо Абэмен және Корея Республикасының Президенті Мун Чжэ Инмен кездесті", - делінген хабарламада.

Тараптар халықаралық күн тәртібіндегі мейлінше өзекті проблемаларды, соның ішінде Корей түбегіндегі жағдайды реттеу мәселелерін талқылады. 

Мемлекет басшысы саммиттің пленарлық отырысында сөйлеген сөзінде қақтығыстардың көбеюі, санкция және сауда соғыстарының өршуі жағдайында халықаралық саясат шиеленістің шегіне жетіп отырғанын атап өтті.

"Біз бүгінгі "Азия-Еуропа" форумының саммитін осы проблемаларды шешу үшін пайдалануымыз қажет. Өкінішке қарай, қазіргі кезде әлем табысты диалог пен өзара түсіністікке қол жеткізе алмай келеді. Бәріміз өткен ғасырдың 60-жылдарындағы Кариб дағдарысын еске салатын бүгінгі экономикалық және саяси текетірестерге куә болып отырмыз", – деді Қазақстан Президенті.

Нұрсұлтан Назарбаев бұл саммит АҚШ, Ресей, Қытай сияқты әлемнің ірі елдерін, Еуропа Одағын халықаралық шиеленістерді шешудің жолын іздеуге шақыруы қажет екенін айтты. Бұл мәселе БҰҰ Бас Ассамблеясының арнайы сессиясында да қарастырылуы мүмкін.

"Егер Сириядағы, Украинадағы және өзге де елдердегі проблемаларды реттемесек, ахуал одан да күрделене түседі. Баллистикалық ракеталардың таралу қаупі сейілмейінше, халықаралық терроризм басты мәселе болып қала бермек", – деді Мемлекет басшысы.

Қазақстан Президенті әлемдік экономикадағы жағдайдың күрделене түсуіне байланысты кейбір кедей мемлекеттердің ахуалы одан әрі қиындайтынын айтып, адамзат үшін оның елеулі қауіп-қатер саналатынын атап өтті.

"Екінші Дүниежүзілік соғыс пен басқа да қақтығыстардан кейін мемлекеттер көшбасшылары тығыз ынтымақтасып, терроризммен күрес жүргізу ісінде ортақ шешімдер таба білді. Сондықтан, мен барлық елдерді диалогқа шақырып, келіссөздер жүргізу үшін Астана алаңын пайдалануды ұсынамын", – деді Нұрсұлтан Назарбаев.

Соңында Мемлекет басшысы Қазақстанның Азия мен Еуропадағы жаһандық сын-тегеуріндерге қарсы тұруға бағытталған серіктестікке белсенді атсалысуға дайын екенін тағы да атап өтті.

Еске сала кетейік, 17 қазанда Мемлекет басшысы "Азия-Еуропа" (АСЕМ) форумының XII саммитіне қатысу үшін Бельгия Корольдігінің Брюссель қаласына келді. Кейінірек Қазақстан Президенті Нұрсұлтан Назарбаев Бельгия Королі Филиппен кездесті.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар