"Нұрлы жер" бағдарламасына қатысатын құрылыс салушылар заңды тұлғалар бірлестігін құрмақ
Жаңа құрылым қатысушы тараптардың мүдделерін білдіретін болады.
Бүгін "Бәйтерек" холдингінде құрылыс салушылармен кездесу өтіп, қатысушылар мемлекеттік сатып алу, құрылыс саласын цифрландыру және мемлекеттік қолдау шаралары туралы заңнамадағы өзгерістерді талқылады. "Нұрлы жер" тұрғын үй құрылысы бағдарламасын іске асыруға қатысатын өңірлік құрылыс компанияларының мәселелерін кешенді шешу үшін қатысушылар заңды тұлғалар бірлестігін құруға уағдаласты, деп хабарлайды BNews.kz.
"Өңірлік құрылыс салушылардың мемлекеттік органдармен және квазимемлекеттік сектор субъектілерімен өзара әрекеттестігі нашар дамыған. Құрылыс салушылар заңнама нормаларын қарастырғанда, соның ішінде тексеруші органдармен жұмыс істеу барысында түсінбеушіліктер орын алып жатады. Ұсыныстар мен проблемалық мәселелерді ортаға салатын бірыңғай орталық жоқ. Сондықтан құрылыс компанияларының өкілдері коммерциялық емес ұйым - заңды тұлғалар бірлестігін құру туралы ұсыныс енгізді", - деді отырыс барысында Қазақстан Республикасының Инвестициялар және даму вице-министрі Қайырбек Өскенбаев.
Жаңа құрылым қатысушы тараптардың мүдделерін білдіретін болады, инновациялар туралы хабардар етеді және мемлекеттік органдарға мемлекеттік реттеу жүйесін жетілдіру бойынша ұсыныстар енгізбек.
"Бәйтерек" холдингі еншілес компаниялар арқылы "Нұрлы жер" бағдарламасының операторы болып табылады. "Бәйтерек" ҰБХ" АҚ басқарушы директоры - басқарма мүшесі Нұржан Нұрланов атап өткендей, Холдинг құрылыс саласын дамыту бойынша көп жұмыс атқаруда.
Бүгінгі күні тұрғын үй жинақ жүйесінде 540 млрд. теңгеден астам сомаға шамамен 1,1 миллион келісімшарт бар. Тұрғын үй құрылыс жинақ банкінің "Өз үйім" бағдарламасы тиімді іске асырылуда, ол бағдарлама халыққа тұрғын үйді белгіленген бағамен ұсынады. "Бәйтерек девелопмент" АҚ өз бағдарламалары аясында екінші деңгейлі банктерге қаражатты шартты орналастыру арқылы тұрғын үй құрылысын қаржыландырады. "Даму" қоры жекеменшік құрылыс салушыларға несиелердің құнын төмендету үшін сыйақы мөлшерлемесін субсидиялайды. Бұдан басқа, жеке құрылыс салушылар үлескерлердің қаражатын тартуға рұқсат алу үшін Тұрғын үй құрылысына кепілдік беру қорына өтініш жасай алады.
2017 жылдан бастап "Нұрлы жер" тұрғын үй құрылысы бағдарламасының аясында жергілікті атқарушы органдардың облигацияларын сатып алу арқылы қаржыландыру жүзеге асырылуда. Әкімшіліктерге жобаларды іріктеу, құрылыс компанияларын тарту, нысандардың құрылысын тексеру бойынша барлық функциялар берілді.
"Бұл механизм екі жылда бір рет "револьверлік" принцип бойынша қаражаттарды аударуға және қосымша қаражатсыз жаңа құрылысқа арналған тұрғын үйді сатудан түсетін қаржыны қайта орналастыруға мүмкіндік береді", - деді Нұрланов.
Кездесу қорытындысы бойынша Құрылыс істері комитетінің, "Бәйтерек" холдингінің және құрылыс салушы компаниялар өкілдері "Нұрлы жер" тұрғын үй құрылысы бағдарламасына, сондай-ақ мемлекеттік сатып алу туралы заңнамаға өзгерістер енгізу бойынша ұсыныстар әзірледі.