Оқушыларды ақылы тестілеуден өткізу заңсыз – Ұлттық бюро

Написать нам
11 қыркүйек, 2018, 19:56 2190 Астана
Оқушыларды ақылы тестілеуден өткізу заңсыз – Ұлттық бюро

ҚР Мемлекеттік қызмет және сыбайлас жемқорлыққа қарсы іс-қимыл агенттігі төрағасы орынбасарының сөзінше, Алматы облысында білім бөлімдерінің нұсқауы бойынша оқушыларды тестілеу тұрақты түрде өткізіліп тұрған.

Оқушыларды ақылы түрде тестілеуден өткізу заңсыз болып есептеледі. Бұл туралы орта білім ұйымдарындағы сыбайлас жемқорлыққа қарсы іс-қимыл мәселесі бойынша өткен жиын барысында Мемлекеттік қызмет және сыбайлас жемқорлыққа қарсы іс-қимыл агенттігі төрағасының орынбасары Олжас Бектенов мәлім етті, деп хабарлайды BNews.kz тілшісі.

Оның айтуынша, білім беру жүйесіндегі проблемалық мәселелердің бірі - мектеп оқушылары арасында ақылы тестілеу өткізу фактілері.

Мысалы, Алматы облысында білім бөлімдерінің нұсқауы бойынша оқушыларды тестілеу тұрақты түрде өткізіліп тұрған.

Мұндай тестілеудің бағасы әрбір оқушыдан 300-ден 500 теңгеге дейінгі қаражатты құраған.

ҚР Білім және ғылым министрлігіне мектептердің қабырғасында ақылы тестілеудің "мәжбүрлі" жүргізілу фактілерін болдырмау бойынша шаралар қабылдау ұсынылды.

"Агенттіктің жұмысы адалдық принциптерін нығайтуға, білім беру жүйесінде "адал ортаны" құруға бағытталған", - деп атап өтті Олжас Бектенов.

Сондай-ақ, кездесу барысында білім саласындағы сыбайлас жемқорлық себептерінің бірі болып табылатын осы сала қызметкерлерінің еңбекақысы төмен деңгейде болу мәселесі қозғалды.

Сонымен бірге, Агенттік мұғалімдерге төленетін еңбекақының көтерілуі әрқашан қосымша қаражат бөлуін талап етпейтінін атап өтті.

Мәселен, Астана қаласындағы балалар үйінің оң тәжірибесі келтірілді, онда басшылықтың принциптік позициясы және жұмысты дұрыс ұйымдастыру жағдайды түбегейлі жақсартуға мүмкіндік берген.

Балалар үйінің директоры Динара Закиеваның сөзінше, басқару тиімділігінің артуы, процестерді оңтайландыру есебінен 90 млн теңгеге жуық сомадағы бюджет қаражатының үнемделуі қамтамасыз етілген.

Бұл жұмысшылардың жалақысын 3-4 есеге көтеруге мүмкіндік берген. Бұрын 30 мың теңге алып отырған жұмысшы, бүгінде 120 мың теңге алады. Балалалар үйінің материалдық-техникалық базасы елеулі жақсарған. Және мұның бәріне бюджеттен қосымша қаражат бөлінуін талап етпей, экономия есебінен қол жеткізілген.

Бұған дейін хабарлағанымыздай, алдағы уақытта мектептер мен балабақшалардың бюджеттерін ашық қолжетімділікте жариялау талап етіледі. ҚР Мемлекеттік қызмет істері және сыбайлас жемқорлыққа қарсы іс-қимыл агенттігі аталған білім беру мекемелерінде толық қаржы есебін міндетті түрде жариялауды ұсынды.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар


Материалды әзірлегендер: