Оңтүстікте осы жылдың екінші үшемі дүниеге келді - Жаңалықтар | BNews

Оңтүстікте осы жылдың екінші үшемі дүниеге келді

Оңтүстікте осы жылдың екінші үшемі дүниеге келді

Шымкенттегі №1 облыстық перинаталдық орталығында ортақ салмағы сегіз келі шамасында болатын үшем дүниеге келді. Бұл – облыс бойынша жыл басынан бері өмірге келген екінші үшем, деп хабарлайды BNews.kz облыс әкімінің баспасөз қызметіне сілтеме жасап.

Бақытты ана Гүлжанат Пердебаеваның енді 5 баласы бар.  Жас ана үш ұл баланы наурыздың 5 күні ота жасау тәсілімен босанған. Дәрігерлердің айтуынша, 35 аптада, айы-күні толмай туылған сәбилердің салмағы 2400 грамм, бойы - 45 см, 2600 грамм, бойы - 46 см, 2700 грамм – бойы 48 см. Бір аптадан аса уақыттың ішінде балалар салмақ қосып, жағдайлары жақсарған.

Үшемнің ата-анасы Мұхтар мен Гүлжанат Шардара ауданының тұрғындары, енді оларды бала көбейгендіктен тұрғын-үй мәселесі толғандыра бастағанын айтады. Олар мемлекеттің көмегіне үміт артып отыр.

Елубаевтар әулетінде дүниеге келген үш балаға ата – әжелері ырымдап Ерасыл, Нұрасыл, Жанасыл деген ат қойған. Олар осыдан үш жыл бұрын Өзбекстаннан көшіп келген.

Жалпы статистикалық мәліметке сүйенсек, соңғы 10 жылдың ішінде облыста жыл сайын 7-13 үшем дүние есігін ашады екен. Осы уақыт ішінде 81 үшем туылған.  Ал бір жылда дүниеге келетін егіздердің саны – 800-ге жуық. Он жылда туылған жергілікті егіздер саны – 7 мыңнан асады. Тек соңғы мерекелік бес күннің өзінде облыс аумағында 700-ге жуық сәби дүние есігін ашқан. Ал 2017 жылы облыста 76 353 сәби дүниеге келген. Олардың жартысына жуығы Шымкент қаласында өмірге келген. Бала туу көрсеткіші бойынша алғашқы қатарда Түркістан қаласы, Сарыағаш, Мақтаарал және Сайрам аудандары тұр.

Осыған дейін ОҚО-да дәрігерлер шала туылған үшемді аман алып қалғаны туралы хабарлағанбыз. Олар Қазақстан бойынша 2018 жылы дүниеге келген алғашқы үшем болатын.

Ұқсас жаңалықтар