Республиканың әр облысы Түркістан қаласына бір ғимараттан салып, сыйға тартады - Жаңалықтар | BNews

Республиканың әр облысы Түркістан қаласына бір ғимараттан салып, сыйға тартады

14 шілде, 13:17 2354 Түркістан облысы
Республиканың әр облысы Түркістан қаласына бір ғимараттан салып, сыйға тартады

Түркістанда ғимараттар шығыс стилінде салынады

Бұл туралы облыс әкімі Жансейіт Түймебаев Түркістан қаласын түркі әлемінің рухани-мәдени орталығы ретінде дамыту бойынша өткен жиында айтты, деп хабарлайды BNews.kz облыс әкімінің баспасөз қызметіне сілтеме жасап.

Басқосуда сөз бастаған аймақ басшысы 1500 жылдан астам тарихы бар Түркістанның өткеніне тоқталды Қазақ хандығының астанасы болған бұл мекен бүкіл түркі әлемінің де  рухани-мәдени астанасы бола білгенін жеткізді. Сонымен қатар, аталған тарихи шаһарды Елбасының тапсырмасына сәйкес,  Қазақстанның рухани орталығы бағытында жандандыру жайына тоқталды.

"Түркістан қаласында бой көтеретін тұрғын үйлер көп қабатты болмайды. Себебі, Қожа Ахмет Яссауи кесенесінің биіктігінен аспау керек. Барлық жерде мавзолей мүмкіндігінше көрініп тұруы қажет. Сондай-ақ, баспаналар Орта-Азиялық стильде, яғни көне дәуірдегі сәулетпен салынуы тиіс. Сонда еліміздегі, кем дегенде, бір қала осындай ескі келбетпен бой көтереді", - деді Жансейіт Түймебаев.

Түркістан қаласын туристер үшін қолайлы  аймаққа айналдыру мәселесін сөз еткен өңір басшысы мұнда жаңадан әуежай, теміржол вокзалы мен автовокзал және қонақ үйлер, дәмханалар салынатынын атап өтті.

Бұдан бөлек, әкім Қ.А. Яссауиға қатысты жарияланған құнды жәдігерлердің көптігінен арнайы Яссауи музейі салыну қажеттігіне де тоқталды.

Жиын барысында Жансейіт Түймебаев Елбасы тапсырмасының аясында республиканың әрбір облысы Түркістан қаласына бір ғимараттан салып, сыйға тартатынын жеткізді. Мәселен, Астана қаласының әкімі Әсет Исекешов "Астана" саябағын салу туралы ұсыныс білдірген.  

Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас жаңалықтар

`

Серіктестер жаңалықтары