Сенаторлар Ташкентте дөңгелек үстел отырысына қатысты

17 шілде, 2018, 09:50 1817
Сенаторлар Ташкентте дөңгелек үстел отырысына қатысты

Дөңгелек үстелдің мақсаты заң шығарудың халықаралық тәжірибесін талқылау болып табылады.

Парламент Сенаты Аграрлық мәселелер, табиғатты пайдалану және ауылдық аумақтарды дамыту комитетінің төрағасы Жеңіс Нұрғалиев пен Экономикалық саясат, инновациялық даму және кәсіпкерлік комитетінің мүшесі Еділ Мамытбеков Ташкент қаласында өткен "Демократияландыру және саяси жүйені жаңғырту жағдайындағы заң шығару және парламенттік бақылау: Өзбекстан тәжірибесі" атты халықаралық дөңгелек үстел отырысына қатысты, деп хабарлайды BNews.kz Парламент Сенатының баспасөз қызметіне сілтеме жасап.

Шараға бірқатар елдердің парламентшілері, сарапшылар, түрлі мемлекеттік органдардың, халықаралық ұйымдардың және бұқаралық ақпарат құралдарының өкілдері қатысты.

Дөңгелек үстелдің мақсаты заң шығарудың халықаралық тәжірибесін талқылау, атқарушы органдарды парламенттік бақылауды талдау және Өзбекстанда жүзеге асқан реформалардың тиімділігін қарастыру болды.

Шараға қатысушылар заң шығару қызметінің қазіргі заманғы әдістері мен қағидаттары, мемлекеттік басқару жүйесіндегі саяси партиялардың рөлі мен орны, Қазақстан, АҚШ, Ұлыбритания, Германия, Италия, Жапония, Канада және басқа елдердегі парламенттік бақылау тәжірибесін салыстырмалы талдау туралы баяндама жасады.

Жеңіс Нұрғалиев өз сөзінде дөңгелек үстелге қатысушыларды еліміздің қоғамдық-саяси және әлеуметтік-экономикалық жаңғырту жөніндегі Елбасы Нұрсұлтан Назарбаевтың бастамасымен таныстырды. Депутат Қазақстанның ішкі саясатының негізгі бағыттары, негізгі стратегиялар мен бағдарламалық құжаттары туралы айтып берді.

Нұрғалиев президенттік өкілеттігінің бір бөлігін биліктің атқарушы және заң шығарушы тармақтарына беру туралы Мемлекет басшысы бастамасының маңызына тоқтала келіп, Қазақстан Парламентінің қызметі туралы хабардар етті. Атап айтқанда, дөңгелек үстелге қатысушылар біздің елімізде жүзеге асқан конституциялық реформа жайында таныстырылды, оның нәтижесінде Парламенттің бақылау міндеттері арта түскені және әлеуметтік-экономикалық саясатты жүзеге асыру мен елдің жай-күйіне Үкіметтің жауапкершілігі күшейтілгені айтылды.

Дөңгелек үстелге қатысушылар талқыланған мәселелерге көзқарастары ұқсас екенін айта келіп, көпжақты парламентаралық ынтымақтастықты жалғастыруды жақтады.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар