"Самұрық-Қазына" бөлетін 300 млрд теңгенің тендеріне шағын және орта бизнес өкілдері қатыса алады

"Самұрық-Қазына" ұлттық компаниясы осы жылдың шілде айында электрондық сатып алу жүйесін жүзеге асыратын порталды іске қосуды жоспарлап отыр. Соның нәтижесінде шағын және орта бизнес өкілдері 300 млрд теңгенің тендеріне қатысуға мүмкіндік алады. Бұл туралы Үкіметтің баспасөз орталығында өткен брифингте компанияның Операциялық қызмет бойынша басқарушы директоры Әлішер Пірметов мәлім етті, деп хабарлайды BNews.kz. 

"Іске қосылатын жүйенің нәтижесінде біз шағын және орта бизнес өкілдерінің осы жүйеге қатысуын жетілдіріп, еліміздегі бәсекелестік ортаны кеңейтуге мүмкіндік аламыз. Аталған жүйе арқылы біз компаниялардың тиімділігін арттыруды мақсат етіп отырмыз. Мысалы, біз холдинг ішіндегі сатып алу мәселесіне талдау жасадық. Мұнда сатып алу процесі 4,5 мың позиция арқылы жүргізіліп келген", - деді Әлішер Пірметов. 

Сондай-ақ, басшы осыған дейін холдинг ішіндегі компаниялар кез келген тауарды, өнімді немесе қызметті сол холдинг ішіндегі компаниялардан сатып алғандығын, демек осы уақытқа дейін шағын және орта бизнес өкілдеріне компанияның тендеріне қатысуға мүмкіндік берілмегендігін айтты.

Әлішер Пірметов 4,5 мың позиция арқылы жүргізіліп келген сатып алу процесінде аталған позициялардың 424-ке дейін азайтылғанын атап өтті.

"Осы жұмысты егжей-тегжейлі жүргізіп, 4,5 мың позицияның әрқайсысын қарап шықтық. Нәтижесінде аталған позицияларды 424-ке дейін азайттық. Сол арқылы біз шағын және орта бизнес өкілдеріне қосымша 300 млрд теңгеге тапсырыс беру мүмкіндігін береміз. Осылайша, бәсекелестік ортаны кеңейтіп, сол арқылы көрсетіліп жатқан қызмет пен тауардың сапасын арттырамыз. Сатып алуға берген қаржаны үнемдеуге мүмкіндік туады", - деді компанияның Операциялық қызмет бойынша басқарушы директоры.