Түркістанда мюзикл премьерасы өтті

16 қараша, 2018, 09:32 2657 Түркістан облысы
Түркістанда мюзикл премьерасы өтті

Мюзикл адалдық пен батылдық, қызғаныш пен күрес көріністерін суреттейді.

Қ.А.Ясауи атындағы ХҚТУ-ң Мәдениет сарайында "Рухани жаңғыру" аясында "Махаббат мұнарасы" мюзиклінің премьерасы өтті. Облыстық мәдениет және тілдерді дамыту басқармасы мен облыстық опера және балет театрының ұйымдастыруымен алғаш рет өткізіліп отырған туындыны тамашалауға зиялы қауым мен аталған жоғары оқу орнының оқытушы құрамы және студенттері, БАҚ өкілдері қатысты, деп хабарлайды BNews.kz облыс әкімдігінің баспасөз қызметіне сілтеме жасап.

Қойылымның ашылу салтанатында облыс әкімі Жансейіт Түймебаев құттықтау сөзін арнап, театр ұжымына шығармашылық табыстар тіледі.

"Премьераны тамашалауға қала тұрғындарының әсіресе жастардың көптеп келуі көңілге қуаныш сыйлайды. Бұл халқымыздың тың дүниеге қызығушылық танытып мәдениетіміздің өркендегенінің дәлелі іспетті. Астана қаласында қойылған мюзикл жаңа облыс орталығында тұңғыш рет сахналануда. Екі көріністен тұратын туынды театр репертуарындағы үздік қойылымдардың біріне айналарына сенімім кәміл. Рухани құндылығы мол мұндай дүниелердің жандануына қолдау білдіріп, насихатталуын қолға алуымыз қажет. Сондықтан да тіл мен ұлтқа бөлінбейтін киелі өнер ұландарының өнерін шетелге танытуды да басты назарға алып, еліміздің мерейін осы арқылы асқақтатуға қадам жасауға болады. Ұлттық өнерді дамытуға үлес қосып халықтың алғысына бөлену жолындағы еңбектеріңіз еселене берсін", – деді аймақ басшысы Жансейіт Түймебаев.

Мюзиклдің әуенін жазған Мақтаарал ауданының тумасы, композитор, облыстық, республикалық, халықаралық байқаулардың жеңімпазы Светлана Ахметова.  Ал, мюзиклдің сөзін жазған жас ақын Мұқағали Кенжетайұлы. 

Басты кейіпкерлерді Әйгерім Жұмабек, Мәдіхан Дүйсеев, Айбек Қанатбек, Күнайым Исмаилова, Айдар Байымбетов, Маржан Шәріпхан, Бақытжан Тұрсыманов сынды театрдың жас әрі тәжірибелі әртістері сомдады. 

Жалпы махаббат лирикасы бейнеленген туындыны сахналауға театрдың 60-тан астам әртісі күш салды. Адалдық пен батылдық, қызғаныш пен күрес көріністері суреттелген қойылым көрермендер көңілінен шығып, зор қошеметке ие болды.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар