Тянь-Шань шыңына "Астананың 20 жылдығы" атауы беріледі - Жаңалықтар | BNews

Тянь-Шань шыңына "Астананың 20 жылдығы" атауы беріледі

02 наурыз, 2018, 17:06 2654 Астана
Тянь-Шань шыңына

Қазақстанның тау сілемдеріне 20 экспедиция ұйымдастырылады да, соңында орталық Тянь-Шаньның бір шыңын бағындырып, оған "Астананың 20 жылдығы" атауы беріледі.

Тянь-Шань тауының бір шыңына "Астананың 20 жылдығы" атауы беріледі. Бұл туралы бүгін «Қазақ туризм» ұлттық компаниясының басқарма төрағасы Рашид Күзембаев айтты, деп хабарлады ҚазАқпарат.

"Астананың 20 жылдығына орай бірнеше қызықты жоба әзірледік, таяу уақытта олар бойынша ынтымақтастық жасалады. Ең қызықты өңірлерді басып өтетін 6 экспедиция ұйымдастырылады. Аталған өңірлер: Алтай, Маңғыстау, Ұлытау, Жоңғар Алатауы және Жібек жолы", - деді ол ҚР Сыртқы істер министрлігінде елімізде тіркелген шетелдік дипломатиялық корпус өкілдеріне арналған брифингте.

Оның айтуынша, әрбір жоба шамамен 12 күнге жоспарланған.

"Біз шетелдік блогерлерді, туристік операторларды тартатын боламыз. Бұл ретте сіздердің көмектеріңізбен аталған экспедиция құрамын барынша тиімді жасақтағымыз келеді", - деді ол.

Сонымен қатар, компания басшысы "20 шың" деп аталатын тағы бір қызықты жобаға тоқталды.

"Өздеріңіз де жақсы білесіздер, Қазақстанның тау сілемдерінің тізбегі ұзақ. Бұл ең бірінші кезекте Орталық Тянь-Шань, Іле, Жоңғар Алатауы, Алтай таулары. Оларға 20 экспедиция ұйымдастырып, ең соңында орталық Тянь-Шаньның бір шыңын бағындырып, оған "Астананың 20 жылдығы" атауы беріледі", - деді Рашид Күзембаев.

Оның айтуынша, елорда мерейтойы аясында "Көшпелілер әлемі" деп аталатын өте қызықты фестиваль ұйымдастырылады. Оған Еуразияны мекендейтін барлық түркі тілдес халықтардың өкілдері қатысады.

"Сонымен қатар фестивальге Мажарстан, Болгария, Түркия және өзге де елдердің командалары шақырылады. Бұл Еуразия көшпелілерінің мәдениетін, салт-дәстүрін, тағамдарын таныстыруға мүмкіндік береді. Шара маусым айының соңы мен шілде айының басында ұйымдастырылады. 10-нан астам елден шамамен 300 қатысушы келеді деп күтіп отырмыз", - деді Рашид Күзембаев.

Біздің Telegram-парақшамызда Қазақстанның маңызды жаңалықтары. Жазылыңыздар!



Читайте также


Ұқсас жаңалықтар