Жаңа газ құбыры үш миллион қазақстандықты газбен қамтамасыз етуге жол ашады - Жаңалықтар | BNews

Жаңа газ құбыры үш миллион қазақстандықты газбен қамтамасыз етуге жол ашады

16 наурыз, 15:54 3229 Астана
Жаңа газ құбыры үш миллион қазақстандықты газбен қамтамасыз етуге жол ашады

Бүгін Үкімет үйінде ҚР энергетика вице-министрі Мағзұм Мырзағалиевтің қатысуымен Президенттің "Елді газбен қамтамасыз етуді жалғастыру" бесінші бастамасын іске асыруға арналған баспасөз конференциясы өтті.

Мағзұм Мырзағалиевтің айтуынша, 2014 жылы Үкімет Қазақстанды 2015–2030 жылдарға дейін газдандырудың бас схемасын бекітті. Осыған сәйкес газдандыру деңгейін ағымдағы 47%-ден 2030 жылға қарай 56%-ке дейін жеткізу көзделіп отыр, деп хабарлады primeminister.kz. Бұл 3 млн адамды немесе 1,6 мыңнан астам елді мекенді газбен қамтамасыз етуге мүмкіндік береді.

"Газ тасымалдау инфрақұрылымын дамытудың еліміздің энергетикалық қауіпсіздігін қамтамасыз етуде және республика экономикасы үшін стратегиялық мәні аса зор. Сондай-ақ, бұл ел халқының экологиялық және әлеуметтік әл-ауқатын жақсартуға жол ашады", - деді вице-министр.

"Қызылорда - Жезқазған - Қарағанды - Теміртау - Астана - Көкшетау - Петропавл" бағыты бойынша "Сарыарқа" магистральді газ құбыры жобасына "ҚазТрансГаз" АҚ техникалық–экономикалық негіздеме әзірлеген болатын. Оған "Мемсараптама" РМК оң бағасын берді. ТЭН-ге сәйкес жобаның жалпы құны - 370 млрд теңгені (ҚҚС-мен) құрайды. Жобаны кезең-кезеңімен іске асыру көзделген.

М. Мырзағалиевтің айтуынша, бүгінде Мемлекет басшысының тапсырмасына сәйкес ұзындығы 1081 шақырым, құны 267 млрд теңге болатын "Қызылорда - Жезқазған - Қарағанды - Астана" бағыты бойынша бірінші кезең әзірленіп жатыр. Газ құбырының осы учаскесі Астана, Қарағанды, Теміртау, Жезқазған қалаларының тұрғындарын және магистральді газ құбыры трассасы бойына жақын орналасқан елді мекендерді табиғи газбен қамтамасыз ететін болады.

"Сарыарқа" жобасын іске асыру Астанада ауаға тасталатын зиянды қалдықтарды жылына 36,1 мың тоннаға дейін азайтуға мүмкіндік береді. "Сарыарқа" магистральді газ құбырының құрылысы барысында шамамен 800 жұмыс орны және оны пайдалану кезеңінде 225 жұмыс орны ашылады деп көзделіп отыр.

Сонымен қатар, Қарағанды, Ақмола облыстары және Астана қаласы әкімдіктері газ тарату желілерін жобалау мен салу мәселелерін пысықтап жатыр. Осылайша тарату желілерінің бірінші кезеңі газ құбырының құрылысы аяқталысымен 2019 жылдың желтоқсанында қосылуға дайын болуы тиіс.

Ұқсас жаңалықтар

`